गढ़वाली गद्य साहित्य / धर्म सिंह कठैत(अजनबी)

[धर्म सिंह कठैत (अजनबी)]

पदानी बोडी का मन कु मैल ..मेरा मन की बात  


बौत साल पुराणी बात छ हम छोटा छोटा थान | क्या छ होनु या समझ थें पर क्या कन्न यी नी जाणदा थान | पदानी बोडी तें भोला दीदा का खुगला पर बेसुध पड़यूँ देखि तें मन माँ एक  सकून सी मिली अर दगड़ा माँ याद ओंण लगिगे बोडी की व चिल्स्य-पिलसी, उ नाज उ नखरा | इंसान जब असमर्थ व्हे जांदू त कख हर्ची जांदा मन का उ बैम,उ विचार सब इंसान बराबर व्हे जांदा क्वी छोटु नि क्वी बाडू नी क्वी ऊँच नी क्वी नीच नी |

भोला दीदा हमारा गौं कु मोची छ | पुराणी रीति सी हमारू गौं भरु- पुरु गौं थों |हमारा गौं माँ मोची, ल्वार, सुनार , औजी, बामण, भंडारी, कठैत  इथ्गा लोग रंदा छन| फसल पात भी खूब ही होंदी छाई पैंसी टक्की त ते जमाना माँ होंदी ही नी थैं |कभी का दिनु माँ सारा गौं का जुत्ता मोची बनादा थान, कुल्ली -दाथाड़ी  ल्वार बनादा थान, लत्ता -कपड़ी   औजी थान |अर बदला माँ सभी परिवारू सी  फसल व्हाण  पर  डाड़्वार ली जांदा थान | बस सारू गौं एक- हक्का  का सारा ही रांदु थों | ओंसी संग्रंदी हो, तीज हो त्यौहार हो,ब्यो कारज हो सब सामिल सब अपुरु सहयोग देनदा थान  आज सभी धणी बदिलिग्या बस कुछ भी उनु नी राइ |

पदानी बोडी बड़ी भेद भाऊ करीदी छाई कई हाकी जाती वालन धारा माँ पाणी भोरी त वीन दस बार धारू ध्वान थों ,गिल्ला कपड़ों मा कै पर हाथ नी लगान्दी थें  | जै झांकरी बोडिं कभी चा कु गिलाश भोला दीदा का हाथ पर नी पकडे थों आज वेकि ही खुगली मा बेसुध पड़ीं थें | अर भोला दीदा वींका का मुख पर पाणी का छिंटा  मान पर थोन झुक्युं की कब बोडी होश मा आली | बोडी होश मा आई |भोला भाई ण बोडी घुघु मा धरी अर घर  पोंचाई दिनी |बोडी  मन कु सारू मैल धूलि गयी | उ दिन थोन अर बस कभी भी झांकरी बोडिं फिर कभी भेद भाऊ नी करी |मांखी मरी तें स्वर्ग व्हे जांदू आज न  ही झांकरी बोडी छ न  भोला दीदा छ| पर उनकी याद सदनी मेरा मन मा राली |
  

[धर्म सिंह कठैत (अजनबी)]

बाघे मुलकात अर मेरु बालु मन  


 आज फिर कुछ  लेखणों कु मन व्हे त अचान्चक मैं तें मेरी बाघ की गैल पैली मुलाकात याद आई | त आप गैल बटुणु छों|  मेरा जीवन की बड़ी रोमांचकारी घटना छ | बौत पुराणी बात उन दिनु की छ हम चोट्टा छां अर स्कूल्या थां | असूज का मैना की द्वी सारी धाण, खाणी नी सेणी नी, कखी साट्टी-झंगोरू, त काखी कुदाड़ी सारी दाल-गौथ  कोदू-मार्सू धाणी कु नौ नी ज्यू कु थौ नी | लोग दिन रात सारियों  रंदा पड्यां |मेरी इक्ल्वारस्य  माँ परेसान क्या त करो, क्या त करो | इक्ल्वार्स्य माँ कु बस हमू पर त चन्न  थों  माँन  बोली बेटों स्कूल जाण सी पैली एक-एक गडोली मार्सा की लै द्या दों | मैं ६ माँ पड़दु  थों  आर मेरु दीदा ९ माँ  हमारा स्कूल जाण का बाद सारा दिन भर  त माँन अकेली ही कन्न थें सभी धणी | चली गयों द्वी भाई सुबेर राति,घाम भी नि आई थों, चा पि तें मुक्क भी नि ध्वे, जूडू-दथुदु उठाई अर लगिज्ञों बाठ ऐथर  फुण  मैं पैथर फुण मेरु भाई | बठा  माँ हमारा गौं की नोनी मिली बोन्नी आज  सुबेर राति...... !
हमुन बोली हाँ | चली ग्यों  ऐथर अजे सारी माँ  ही पोंछी थान की हमारा गौं का पदान बड़ा का ड़ोखरा  मा बाघ .......! मेरी सिट्टी पिट्टी गोल, रोणे की फिचिन्दाली,मैं रोण पर झुक्युन अर मेरु भाई मैं चुप करों पर झुक्युन |   मैं भी  मेरु भाई भी मुड्यों  वापस अर उकाल का बाठा  घर कु भाग्यों मुठियों पर थूक लागेक | मैं लगी कि आज बाघन खैल्यों,  उकाली का बाठा  गोली की तरों  थां हम भागण लाग्यां | गौं का नजदीक पोंछी तें मैं पैथर छों देखुनु की कखी बाघ पिछाड़ी त नी आणु | भाई मी तें चुप करेक थाकिगी पर मी चुप नि व्होयों बौत देर का बाद भाई न बोली भुला धर्मी अब चलिगी होलू बाघ चल अब जोला |
       आज भी मी तें बाघ की गिल व पैली मुलाकात याद आंदी त मेरा रोम-रोम खड़ा व्हे जांदा | साथ ही याद आई जंडू उ प्यारु बचपन जै मा जाणो कु मेरु ज्यू तर्स्णु रांदु |