हमरा पहाड़ मा (छ्‌विं-बत्थूं कि कछड़ी)

[धनेश कोठारी]

छ्‌विं-बत्थूं कि ईं कछड़ी मा हम अपणा पहाड़ का सामाजिक, सांस्कृतिक, ऐतिहासिक, धार्मिक ब्यूंत व्यवहार कि, रीति-नीति कि बातचीत कर्‌ला। दगड़ मा बांटला अपणि जानकारी।

[धनेश कोठारी]

देवतौं का समान छन ढोल दमौ

पहाड़ यानि गढ़वाळ, कुमौ अर जौनसार मा ढोल दमौ सणि देवतुल्य माण्ये जांद। पहाड़ का यू वाद्ययंत्र दुन्या का एकमात्र वाद्ययंत्र छन जौं मा देवतौं तक औतर्न कि सामर्थ च। पौराणिक उल्लेख का अनुसार तांबा-पीतळा से बण्यां ढोल-दमौ का द्वी पाळी मा मढ़ी पुड़ मा दिन-रात का द्य़ब्ता सूर्ज-चन्द्र्मा त डोर मा भगवान गणेश बिराज्यां छन। ढोल का गैल दमौ तैं काली का खप्पर का रुप मा मान्यता च। यूं का बोलूं मा ब्वल्दा कि सरस्वती साक्षात रौंदी।
उत्तराखण्ड कू क्वी मंगल कारज यन नि होंद कि जैमा ढोल-दमौ शामिल नि होंद। मंगल कारज कि पंवाण ही ढोल-दमौ का नादस्वर से धुंयाळ बजैक ही लगद। दगड़ मा लगदन्‌ हमारा सांस्कृतिक थाती का जागर, मण्ड्याण, बारता, पंवड़ा अर सृष्टि कि उत्पति कि कथा, वीर भड़ूं कि भड़्वाळी गाथा अर चैती का माध्यम से हमरा लोकजीवन मा पसर्यां प्राकृतिक रंगूं कि बाणी। ईं दुन्या हमरा ढोल-दमौ ही छन जौंका अपणा लिपिबद्ध ताल-स्वर ढोलसागर का रूप मा संकलित च। यख मा उकाळी कि छ्‌विं च, उन्दारी कि उणग्यास च, सैन्वार का शबद छन, सवाल-जवाब छन, आपस कू स्वाळ-द्वारू च। रैबार च, रौंस च अर पछाण च हमरी एक अलग गौरवपूर्ण संस्कृति कि।

[धनेश कोठारी]

आमतौर पर हम अपड़ा बड़ौं थैं सेवा लगौन्दां। बड़ा सयाणा बि हमतैं आशीष देन्दन्‌। पण, आपन्‌ अक्सर देखि होलू कि बड़ा बि आशीर्वाद तब्बि देंदन्‌ जब हम सेवा सौंळी कर्दा। सामाजिकता अर हमरा रीति रिवाज बि ई बोदा कि बड़ौं कू सम्मान जरूरी च। या परम्परा पहाड़ क्य सर्रा मुल्क देश मा एक सि च।
पण, मेरि जल्मभूमि दिबरग (देवप्रयाग) मा ईं परम्परा कि दगड़ ही एक हौर सामाजिक व्यवहारिकता च कि कदाचित यदि अफ्वू से छ्‌वट्टा का द्वारा सेवा सौळी नि ह्‍वे सकी या कि कै बड़ा कि नजर वे फरैं पैलि प्वड़गी त्‌ वू ही छ्‌वट्टा द्वारा सेवा लगौण से पैलि ही  चिरंजीव बोली आशीष दे देंद।
यानि कि- यन्न स्थिति मा व्यक्तिगत आग्रह अर अहं गौण ह्‌वेक सामाजिक समरसता मा बिर्द्धी कर्दन्‌। ज्वा कि अपणा आप मा निश्चित ही उल्लेखनीय च।

[धनेश कोठारी]

आस्था कू एक रूप यन बि

एक बार बल एक बुड्ड़ी भैंसू लेणों हैका गौं गै। भैंसू मोल्याई अर यखुली ही वे थैं लेक अपणा गौं का बाटा लगि। ह्‍यूंदा दिन जाण्दै छां कि कतगा अवरा (छ्‌वट्टा) होंदन्‌। बुड्ड़ी तैं गौं पौंछण से पैलि ही बाटा मा रात प्वड़गी। जंगळौ बाटू छौ, दगड़ मा भैंसू सरिका रागसि जानवर, स्यू डौर बि लगण ई छै। यना बग्त मनखि भगवान को सुमिरण कर्दू। बुड्ड़ी तैं मालूम छौ कि हनुमान चालीसा से चेड़ा-चेटगा, भूत-प्रेत सौब भाग जांदन्‌। पण, करू क्या? अबारि त्‌ हनुमान चालीसा बि याद नि छै। याद छौ त्‌ सिर्फ हनुमान अर वांक्‌ दगड़ चट्टी शब्द। पण, शैद पट्ट मिलौण छौ स्यू बुड्ड़ीन्‌ दगड़ मा मिलै राणिबाग चट्टी। राणिबाग चट्टी देवप्रयाग से श्रीनगर कि तर्फ बग्वान का बीच बदरीनाथ का पुराणा पैदल बाटा पर एक जगा च। ईं जगा कू यू नौ बि तबारि कू ही च। स्यू बुड्ड़ीन्‌ हनुमान चालीसा कि जगा सुमरि----
"हनुमान चट्टी-राणिबाग चट्टी, हनुमान चट्टी-राणिबाग चट्टी, हनुमान चट्टी-राणिबाग चट्टी"
अर राति कि द्वी बजि का नजीक अपणा गौं पौंछी।